ಕರುನಾಡು ಘರ್ಜನೆ ಸುದ್ದಿ : ಇಂದು ಕಲಬುರಗಿ ಜಿಲ್ಲಾ ಕಚೇರಿಯಲ್ಲಿ, ವೆಲ್ಫೇರ್ ಪಾರ್ಟಿ ಆಫ್ ಇಂಡಿಯಾ – ಕರ್ನಾಟಕ ರಾಜ್ಯಾಧ್ಯಕ್ಷ ಅಡ್ವಕೇಟ್ ತಾಹೀರ್ ಹುಸೇನ್ ಅವರ ನೇತೃತ್ವದಲ್ಲಿ ಪತ್ರಿಕಾ ಮತ್ತು ಮಾಧ್ಯಮ ಗೋಷ್ಠಿ ನಡೆಯಿತು.
ಈ ಸಂದರ್ಭದಲ್ಲಿ, ರಾಜ್ಯ ವಕ್ಫ್ ಮಂಡಳಿಯಿಂದ ರಾಜ್ಯದ 15 ಜಿಲ್ಲೆಗಳಲ್ಲಿ ಸ್ಥಾಪನೆಯಾಗಬೇಕಾದ ಹೆಣ್ಮಕ್ಕಳ ಕಾಲೇಜುಗಳ ಪ್ರಸ್ತುತ ಸ್ಥಿತಿ ಕುರಿತು ಅವರು ಮಾತನಾಡಿದರು. ಆ 15 ಜಿಲ್ಲೆಗಳ ಯಾವುದೇ ಪ್ರದೇಶದಲ್ಲಿಯೂ ಇನ್ನೂ ಕಟ್ಟಡ ನಿರ್ಮಾಣ ಪ್ರಾರಂಭವಾಗದಿರುವುದಕ್ಕೆ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದರು. ಸರ್ಕಾರ ಕೂಡಲೇ ಕಾಮಗಾರಿಯನ್ನು ಪ್ರಾರಂಭಿಸಿ ಅಲ್ಪಸಂಖ್ಯಾತ ಸಮುದಾಯಕ್ಕೆ ನೀಡಿದ ವಾಗ್ದಾನಗಳನ್ನು ಈಡೇರಿಸಬೇಕೆಂದು ಅವರು ಒತ್ತಾಯಿಸಿದರು.
ಅಡ್ವಕೇಟ್ ತಾಹೀರ್ ಹುಸೇನ್ ಅವರು ರಾಜ್ಯದಾದ್ಯಂತ ಮೌಲಾನಾ ಆಜಾದ್ ಶಾಲೆಗಳ ತೀರಾ ದುರ್ಬಲ ಸ್ಥಿತಿಗೆ ಬಗ್ಗೆ ಮಾತಾಡಿ, ರಾಜ್ಯದಲ್ಲಿ ಶಾಲಾ ವಿದ್ಯಾರ್ಥಿಗಳಿಗೆ ಸಮರ್ಪಕ ಸೌಲಭ್ಯಗಳ ಕೊರತೆ ಮತ್ತು ಶೈಕ್ಷಣಿಕ ಗುಣಮಟ್ಟದ ಅಭಾವದಿಂದಾಗಿ SSLC ಫಲಿತಾಂಶಗಳು ತುಂಬಾ ನಿರಾಶಾಜನಕವಾಗಿವೆ, ವಿಶೇಷವಾಗಿ ಹೈದರಾಬಾದ್-ಕರ್ನಾಟಕ ಜಿಲ್ಲೆಯ ಶಾಲೆಗಳ ಸ್ಥಿತಿ ತೀರಾ ಹದಗೆಟ್ಟಿದೆ ಎಂದು ಹೇಳಿದರು.
ಅವರು ಎಚ್ಚರಿಕೆ ನೀಡುತ್ತಾ — ಹೆಣ್ಮಕ್ಕಳ ಕಾಲೇಜುಗಳ ನಿರ್ಮಾಣ ತಕ್ಷಣ ಪ್ರಾರಂಭವಾಗದೆ ಇದ್ದರೆ ಹಾಗೂ ಮೌಲಾನಾ ಆಜಾದ್ ಶಾಲೆಗಳ ಶಿಕ್ಷಣ ಮತ್ತು ಮೂಲಸೌಕರ್ಯದ ಸಮಸ್ಯೆಗಳಿಗೆ ಅಲ್ಪಸಂಖ್ಯಾತ ಕಲ್ಯಾಣ ಇಲಾಖೆ ಗಮನ ಹರಿಸದೆ ಇದ್ದರೆ, ವೆಲ್ಫೇರ್ ಪಾರ್ಟಿ ರಾಜ್ಯದಂತ ಪ್ರತಿಭಟನೆ ಕೈಗೊಳ್ಳಬೇಕಾಗುತ್ತದೆ ಎಂದು ಹೇಳಿದರು.
ಈ ಪತ್ರಿಕಾಗೋಷ್ಠಿಯಲ್ಲಿ ರಾಜ್ಯ ಕಾರ್ಯದರ್ಶಿಗಳಾದ ಶ್ರೀ ರಿಜ್ವಾನ್ ಹಮನಾಬಾದ್, ಶ್ರೀ ಮುಬೀನ್ ಅಹಮದ್, ವಲಯ ಕಾರ್ಯದರ್ಶಿ ಶ್ರೀ ಇರ್ಫಾನ್, ಜಿಲ್ಲಾ ಅಧ್ಯಕ್ಷ ಶ್ರೀ ಸಲೀಂ ಅಹಮದ್, ಮತ್ತು ಉಪಾಧ್ಯಕ್ಷ ಶ್ರೀ ಸಿದ್ದಣ್ಣ ಚಕ್ರ ಉಪಸ್ಥಿತರಿದ್ದರು.
