ಗದಗ ನಗರದ ಸಂಚಾರಿ ಸಿಗ್ನಲ್‌ಗಳಲ್ಲಿ ‘ಹಸಿರು ಹೊದಿಕೆ’ ಕ್ರಾಂತಿ: ಜಿಲ್ಲಾ ಸವಿತಾ ಸಮಾಜದ ಹೋರಾಟಕ್ಕೆ ಸಂದ ಮೊದಲ ಜಯ!

ಕರುನಾಡು ಘರ್ಜನೆ ಸುದ್ದಿ ಗದಗ (ಮಾ. 25): ನಗರದಲ್ಲಿ ಹೆಚ್ಚುತ್ತಿರುವ ಸೂರ್ಯನ ಪ್ರಖರ ಬಿಸಿಲಿನಿಂದ ಸಾರ್ವಜನಿಕರನ್ನು ರಕ್ಷಿಸಲು ಟ್ರಾಫಿಕ್ ಸಿಗ್ನಲ್‌ಗಳಲ್ಲಿ ‘ಹಸಿರು ಹೊದಿಕೆ’ ಅಳವಡಿಸುವಂತೆ ಗದಗ ಜಿಲ್ಲಾ ಸವಿತಾ ಸಮಾಜ ನಡೆಸಿದ ನಿರಂತರ ಪ್ರಯತ್ನಕ್ಕೆ ಅಭೂತಪೂರ್ವ ಯಶಸ್ಸು ಸಿಕ್ಕಿದೆ.ಬೂಮರೆಡ್ಡಿ ಸರ್ಕಲ್‌ನಲ್ಲಿ ನೆರಳಿನ ಆಸರೆ: ಜಿಲ್ಲಾಡಳಿತದ ತುರ್ತು ಸ್ಪಂದನೆಗೆ ಕೃತಜ್ಞತೆ ಸಲ್ಲಿಸಿದ ಕೃಷ್ಣಾ ಎಚ್. ಹಡಪದ
ಸವಿತಾ ಸಮಾಜದ ವತಿಯಿಂದ ಕಳೆದ ಮಾ. 18ರಂದು ನೀಡಲಾಗಿದ್ದ ಪತ್ರಿಕಾ ಹೇಳಿಕೆಗೆ ಜಿಲ್ಲಾಡಳಿತವು ಅತ್ಯಂತ ವೇಗವಾಗಿ ಸ್ಪಂದಿಸಿದ್ದು, ನಗರದ ಪ್ರಮುಖ ಜಂಕ್ಷನ್ ಆದ ಬೂಮರೆಡ್ಡಿ ಸರ್ಕಲ್‌ನಲ್ಲಿ ಸಮರೋಪಾದಿಯಲ್ಲಿ ಹಸಿರು ಹೊದಿಕೆ ಅಳವಡಿಸುವ ಕಾರ್ಯ ಆರಂಭಗೊಂಡಿದೆ.
ಈ ಕುರಿತು ಹರ್ಷ ವ್ಯಕ್ತಪಡಿಸಿರುವ ಗದಗ ಜಿಲ್ಲಾ ಸವಿತಾ ಸಮಾಜದ ಜಿಲ್ಲಾಧ್ಯಕ್ಷರಾದ ಕೃಷ್ಣಾ ಎಚ್. ಹಡಪದ, “ಸಾರ್ವಜನಿಕರ ಹಿತದೃಷ್ಟಿಯಿಂದ ನಾವು ಸಲ್ಲಿಸಿದ ಮನವಿಯನ್ನು ಪುರಸ್ಕರಿಸಿ, ತಕ್ಷಣವೇ ಕಾರ್ಯಪ್ರವೃತ್ತರಾದ ಜಿಲ್ಲಾಧಿಕಾರಿಗಳಿಗೆ ಹಾಗೂ ಸಂಬಂಧಪಟ್ಟ ಅಧಿಕಾರಿಗಳಿಗೆ ಸಮಸ್ತ ಸವಿತಾ ಸಮಾಜದ ಪರವಾಗಿ ಹೃತ್ಪೂರ್ವಕ ಕೃತಜ್ಞತೆಗಳನ್ನು ಸಲ್ಲಿಸುತ್ತೇವೆ. ಇದು ಕೇವಲ ಸಮಾಜದ ಜಯವಲ್ಲ, ಬಿಸಿಲಿನಲ್ಲಿ ಬೇಯುತ್ತಿದ್ದ ಪ್ರತಿಯೊಬ್ಬ ನಾಗರಿಕನ ಜಯ,” ಎಂದು ತಿಳಿಸಿದ್ದಾರೆ.
ಬೂಮರೆಡ್ಡಿ ಸರ್ಕಲ್ ಮಾದರಿಯಲ್ಲೇ ನಗರದ ಮತ್ತೊಂದು ಪ್ರಮುಖ ಪ್ರದೇಶವಾದ ಮುಳಗುಂದ ನಾಕಾ ಸೇರಿದಂತೆ ನಗರದ ಎಲ್ಲಾ ಸಂಚಾರಿ ಸಿಗ್ನಲ್‌ಗಳಲ್ಲಿಯೂ ಕೂಡಲೇ ಹಸಿರು ಹೊದಿಕೆಯನ್ನು ಅಳವಡಿಸಬೇಕು. ಸಿಗ್ನಲ್‌ಗಾಗಿ ಕಾಯುವ ಶಾಲಾ ಮಕ್ಕಳು, ವೃದ್ಧರು ಹಾಗೂ ಮಹಿಳೆಯರಿಗೆ ಇದರಿಂದ ಹೆಚ್ಚಿನ ಅನುಕೂಲವಾಗಲಿದೆ ಎಂದು ಕೃಷ್ಣಾ ಎಚ್ ಹಡಪದ ಅವರು ಜಿಲ್ಲಾಡಳಿತಕ್ಕೆ ಒತ್ತಾಯಿಸಿದ್ದಾರೆ.
“ಬಿಸಿಲಿನಲ್ಲಿ ನಿಂತು ಕರ್ತವ್ಯ ನಿರ್ವಹಿಸುವ ಟ್ರಾಫಿಕ್ ಪೊಲೀಸರು ಕೇವಲ ದಂಡ ವಿಧಿಸುವವರಲ್ಲ, ಅವರು ನಮ್ಮಂತೆಯೇ ರಕ್ತಮಾಂಸಗಳಿರುವ ಮನುಷ್ಯರು. ಸಿಗ್ನಲ್ ಮಾಹಿತಿಯಿಲ್ಲದೆ ರಸ್ತೆ ದಾಟುವ ಹಿರಿಯರು ಮತ್ತು ಮಕ್ಕಳನ್ನು ಕೈಹಿಡಿದು ಸುರಕ್ಷಿತವಾಗಿ ದಡ ಸೇರಿಸುವ ಅವರ ಮಾನವೀಯ ಕಾರ್ಯ ಶ್ಲಾಘನೀಯ. ಇಂತಹ ಕಡು ಬಿಸಿಲಿನಲ್ಲಿ ಶ್ರಮಿಸುತ್ತಿರುವ ಪೊಲೀಸರ ಆರೋಗ್ಯದ ದೃಷ್ಟಿಯಿಂದ ಅವರಿಗೆ ಸಿಗ್ನಲ್ ಪಾಯಿಂಟ್‌ಗಳಲ್ಲಿ ನೆರಳಿನ ವ್ಯವಸ್ಥೆ, ಶುದ್ಧ ಕುಡಿಯುವ ನೀರು ಹಾಗೂ ಮಜ್ಜಿಗೆಯಂತಹ ಮೂಲಭೂತ ಸೌಲಭ್ಯಗಳನ್ನು ಪೊಲೀಸ್ ಇಲಾಖೆ ಹಾಗೂ ಜಿಲ್ಲಾಡಳಿತ ಒದಗಿಸಬೇಕು,” ಎಂದು ಕೃಷ್ಣಾ ಹಡಪದ ಅವರು ಆಗ್ರಹಿಸಿದ್ದಾರೆ.
ಸಾರ್ವಜನಿಕರ ಸಂಕಷ್ಟಕ್ಕೆ ತಕ್ಷಣ ಸ್ಪಂದಿಸಿದ ಜಿಲ್ಲಾಡಳಿತವು, ಮುಳಗುಂದ ನಾಕಾ ಸೇರಿದಂತೆ ಉಳಿದ ಬೇಡಿಕೆಗಳಿಗೂ ಶೀಘ್ರವಾಗಿ ಚಾಲನೆ ನೀಡುವ ಮೂಲಕ ಮಾದರಿಯಾಗಲಿ ಎಂದು ಗದಗ ಜಿಲ್ಲಾ ಸವಿತಾ ಸಮಾಜವು ಜಿಲ್ಲಾಧ್ಯಕ್ಷರಾದ ಕೃಷ್ಣ ಎಚ್ ಹಡಪದ ಅವರು ಮನವಿ ಮಾಡಿದ್ದಾರೆ.