ಬೇಗಳೂರು: ಸಿಲಿಕಾನ್ ಸಿಟಿಯ ಸ್ವಚ್ಛತೆ ಕಾಪಾಡಲು ಗ್ರೇಟರ್‌ ಬೆಂಗಳೂರು ಪ್ರಾಧಿಕಾರ ಹರಸಾಹಸ ಪಡುತ್ತಿದೆ. ರಸ್ತೆಗಳಲ್ಲಿ ಅಲ್ಲಲ್ಲಿ ಕಸ ಹಾಕುವುದನ್ನು ತಪ್ಪಿಸಲು, ಕಸ ಹಾಕಿರುವವರನ್ನು ಪತ್ತೆ ಹಚ್ಚಿ ಅವರ ಮನೆ ಮುಂದೆ ಲೋಡ್‌ ಗಟ್ಟಲೇ ತ್ಯಾಜ್ಯ ಸುರಿಯುವುದನ್ನು ಆರಂಭಿಸಿದೆ.
ಈ ಪ್ರಕ್ರಿಯೆಯಿಂದ ಸಾಕಷ್ಟು ಜನರು ಎಚ್ಚೆತ್ತುಕೊಂಡು ಕಸದ ಲಾರಿಗಳಿಗೆ ತ್ಯಾಜ್ಯ ನೀಡಲು ಆರಂಭಿಸಿದ್ದಾರೆ. ಆದರೆ ಯುವತಿಯೊಬ್ಬಳು ರಸ್ತೆಯಲ್ಲಿ ಕಸ ಸುರಿದು ಸಿಸಿಟಿವಿ ಮುಂದೆ ಡ್ಯಾನ್ಸ್‌ಮಾಡಿದ ಘಟನೆ ಬೆಳಕಿಗೆ ಬಂದಿದೆ.
ಬೆಂಗಳೂರಿನ ಮೈಕೋ ಲೇಔಟ್‌ನ ಬೀದಿಯೊಂದರಲ್ಲಿ ಯುವತಿಯೊಬ್ಬಳು ರಾತ್ರಿ ವೇಳೆ ಕೈಯಲ್ಲಿದ್ದ ಕಸದ ಕವರ್ ಅನ್ನು ರಸ್ತೆ ಬದಿಗೆ ಎಸೆದಿದ್ದಾಳೆ.
ನಂತರ ಅಲ್ಲೇ ಇದ್ದ ಸಿಸಿಟಿವಿ ಮುಂದೆ ಖುಷಿಯಿಂದ ಡ್ಯಾನ್ಸ್ ಮಾಡಿರುವ ವಿಡಿಯೋ ಪತ್ತೆಯಾಗಿದೆ. ಈ ವಿಡಿಯೋ ಆಧರಿಸಿ ಮನೆ ಹುಡುಕಿ ಆಕೆ ಮತ್ತು ಸ್ನೇಹಿತೆಯರಿಗೆ ದಂಡ ವಿಧಿಸುವ ಕೆಲಸವನ್ನು ಗ್ರೇಟರ್‌ ಬೆಂಗಳೂರು ಪ್ರಾಧಿಕಾರದ ಮಾರ್ಷಲ್ಸ್‌ ಮಾಡಿದ್ದಾರೆ.
ಮೈಕೋ ಲೇಔಟ್‌ನ ಬೀದಿಯಲ್ಲಿ ಕಸ ಎಸೆಯುವುದನ್ನು ತಪ್ಪಿಸಲು ಗ್ರೇಟರ್‌ ಬೆಂಗಳೂರು ಪ್ರಾಧಿಕಾರ ಸಿಸಿಟವಿ ಅಳವಡಿಸಿತ್ತು. ಹೀಗಿದ್ದರೂ ಸಹ ಮೂವರು ಯುವತಿಯರು ರಸ್ತೆಯಲ್ಲಿ ಕಸ ಎಸೆಯಲು ಬಂದಿದ್ದಾರೆ. 
ಇಬ್ಬರು ಕಸ ಎಸೆಯುತ್ತಿದ್ದರೆ, ಮತ್ತೊಬ್ಬ ಯುವತಿ ಈಗಾಗಲೇ ಕಸ ಎಸೆದು ಡ್ಯಾನ್ಸ್ ಮಾಡುವುದು ಕಣ್ಣಿಗೆ ಕಾಣಿಸಿತು. ಮಾರ್ಷಲ್‌ಗಳು ಸಿಸಿಟಿವಿ ದೃಶ್ಯವನ್ನು ಆಧರಿಸಿ ಯುವತಿಯನ್ನು ಪತ್ತೆ ಹಚ್ಚಿ, ಆಕೆಯ ಮನೆಗೆ ನೇರವಾಗಿ ಭೇಟಿ ನೀಡಿದ್ದಾರೆ.
ಕಳೆದ ಹಲವು ದಿನಗಳಿಂದ ರಾತ್ರಿ ವೇಳೆ ಕೆಲವರು ಕಸವನ್ನು ರಸ್ತೆ ಬದಿಗೆ ಸುರಿದು, ಆ ಸ್ಥಳವನ್ನು ಡಂಪಿಂಗ್ ಯಾರ್ಡ್ ಆಗಿ ಪರಿವರ್ತಿಸಿದ್ದರು.
ಇದರಿಂದ ಸುತ್ತಮುತ್ತಲಿನ ನಿವಾಸಿಗಳಿಗೆ ತೀವ್ರ ತೊಂದರೆಯಾಗಿತ್ತು. ಈ ಸಮಸ್ಯೆಗೆ ಅಂತ್ಯ ಹಾಡಲು ನಿರ್ಧರಿಸಿದ ಸ್ಥಳೀಯರು, ಕಸ ಎಸೆಯುವವರನ್ನು ಪತ್ತೆ ಹಚ್ಚಲು ಅದೇ ಜಾಗದಲ್ಲಿ ಸಿಸಿಟಿವಿ ಕ್ಯಾಮೆರಾ ಅಳವಡಿಸಿದ್ದರು.
ಅದರಂತೆ, ನಿನ್ನೆ ರಾತ್ರಿ ಕೆಲ ಯುವತಿಯರು ಅದೇ ಜಾಗಕ್ಕೆ ಬಂದು ಕಸದ ಕವರ್ ಎಸೆದಿದ್ದಾರೆ. ಅಷ್ಟಕ್ಕೆ ಸುಮ್ಮನಾಗದೆ, ತಾವು ಕಸ ಹಾಕಿದ್ದನ್ನು ಸಂಭ್ರಮಿಸುವಂತೆ ಸಿಸಿಟಿವಿ ಕ್ಯಾಮೆರಾ ಮುಂದೆಯೇ ಡ್ಯಾನ್ಸ್ ಮಾಡಿ ಉದ್ಧಟತನ ಮೆರೆದಿದ್ದಾರೆ. ಈ ದೃಶ್ಯವನ್ನು ಗಮನಿಸಿದ ಮನೆಯ ಮಾಲೀಕರು, ತಕ್ಷಣವೇ ಬಿಬಿಎಂಪಿ ಮಾರ್ಷಲ್‌ಗಳ ಗಮನಕ್ಕೆ ತಂದಿದ್ದಾರೆ.
ಮಾಹಿತಿ ಪಡೆದ ಕೂಡಲೇ ಸ್ಥಳಕ್ಕೆ ದೌಡಾಯಿಸಿದ ಮಾರ್ಷಲ್‌ಗಳು, ಸಿಸಿಟಿವಿ ದೃಶ್ಯಾವಳಿಯನ್ನು ಆಧರಿಸಿ ಯುವತಿಯರನ್ನು ಪತ್ತೆ ಹಚ್ಚಿ ಯುವತಿಗೆ ದಂಡ ಹಾಕಿದ್ದಾರೆ.
ಸಾರ್ವಜನಿಕ ಸ್ಥಳದಲ್ಲಿ ಕಸ ಎಸೆದು ಸ್ವಚ್ಛತೆಗೆ ಧಕ್ಕೆ ತಂದ ಆರೋಪದ ಮೇಲೆ ಯುವತಿಗೆ 1,000 ರೂಪಾಯಿ ದಂಡ ವಿಧಿಸಿದ್ದಾರೆ. ದಂಡ ಪಾವತಿಸಿದ ರಶೀದಿ ಮತ್ತು ಅಧಿಕಾರಿಗಳು ಯುವತಿಗೆ ದಂಡ ವಿಧಿಸುತ್ತಿರುವ ಚಿತ್ರಗಳು ಈಗ ಲಭ್ಯವಾಗಿವೆ. ಸಾರ್ವಜನಿಕ ಸ್ಥಳದಲ್ಲಿ ಕಸ ಎಸೆಯದಂತೆ ಕಟ್ಟುನಿಟ್ಟಿನ ಎಚ್ಚರಿಕೆ ನೀಡಿದ್ದಾರೆ.
