ಕರುನಾಡು ಘರ್ಜನೆ ಸುದ್ದಿ ಹುಬ್ಬಳ್ಳಿ: ಇಲ್ಲಿನ ಸ್ಟೇಷನ್ ರಸ್ತೆಯ ಕೆನರಾ ಬ್ಯಾಂಕ್‌ನಲ್ಲಿ ಜಂಟಿ ಖಾತೆ ಮಾಡಿಸುತ್ತೇನೆ ಎಂದು ಮಹಿಳೆಯೊಬ್ಬರ ಬ್ಯಾಂಕ್ ಖಾತೆಯಿಂದ ಹಣ ಡ್ರಾ ಮಾಡಿಕೊಂಡಿದ್ದ ಆರೋಪಿಯನ್ನು ಶಹರ ಠಾಣೆ ಪೊಲೀಸರು ಬಂಧಿಸಿದ್ದಾರೆ.
ಬ್ಯಾಂಕ್‌ನಲ್ಲಿ ಸ್ವಚ್ಛತಾ ಸಿಬ್ಬಂದಿಯಾಗಿ ಹೊರಗುತ್ತಿಗೆಯಲ್ಲಿ ಕೆಲಸ ಮಾಡುತ್ತಿದ್ದ ದರ್ಶನ ನಾಯಕ ಬಂಧಿತ ಆರೋಪಿ. ಗಂಡ-ಹೆಂಡತಿ ಹೆಸರಲ್ಲಿ ಜಂಟಿ ಖಾತೆ ಮಾಡಿಸುತ್ತೇನೆ ಎಂದು ಹೆಬಸೂರಿನ ಆರತಿ ನಾಗನೂರು ಅವರ ಪಾಸ್ ಬುಕ್ ಪಡೆದು, ₹56.84 ಲಕ್ಷ ಡ್ರಾ ಮಾಡಿಕೊಂಡು ವಂಚಿಸಿರುವ ಆರೋಪದ ಕುರಿತು ಪ್ರಕರಣ ದಾಖಲಾಗಿತ್ತು.
‘ಈ ಪ್ರಕರಣದಲ್ಲಿ ಬ್ಯಾಂಕ್ ಸಿಬ್ಬಂದಿಯ ಸಹಕಾರವಿರುವುದು ಕಂಡುಬಂದಿದೆ. ಅಪಘಾತದಲ್ಲಿ ಗಾಯಗೊಂಡಿದ್ದ ಆರತಿ ಅವರಿಗೆ ಎರಡನೇ ಮಹಡಿಯಲ್ಲಿದ್ದ ಬ್ಯಾಂಕ್‌ಗೆ ಹತ್ತಲು ಸಾಧ್ಯವಾಗುತ್ತಿರಲಿಲ್ಲ. ಒಂದೆರಡು ಬಾರಿ ಆರೋಪಿ ಹಣ ಡ್ರಾ ಮಾಡಿಕೊಳ್ಳುವ ಸ್ಲಿಪ್‌ನಲ್ಲಿ ಆರತಿ ಅವರ ಸಹಿ ಪಡೆದು ಹಣ ಡ್ರಾ ಮಾಡಿಕೊಟ್ಟಿದ್ದ. ನಂತರ ಜಂಟಿ ಖಾತೆ ಮಾಡಿಸುವುದಾಗಿ ಹೇಳಿ ಪಾಸ್‌ಬುಕ್ ತಾನೇ ಇಟ್ಟುಕೊಂಡು, ಅವರು ಕೆಳಗಡೆ ಇದ್ದಾರೆ ಎಂದು ಕ್ಯಾಷಿಯರ್‌ಗೆ ಸುಳ್ಳು ಹೇಳಿ ಸ್ಲಿಪ್‌ನಲ್ಲಿ ನಕಲಿ ಸಹಿ ಹಾಕಿ ಹಣ ಪಡೆಯುತ್ತಿದ್ದ. ಎರಡು ವರ್ಷದ ಅವಧಿಯಲ್ಲಿ 40 ಹಂತದಲ್ಲಿ ಹಣ ಡ್ರಾ ಮಾಡಿಕೊಂಡಿದ್ದಾನೆ.
ಬ್ಯಾಂಕ್‌ನ ನಾಲ್ಕು-ಐದು ಕ್ಯಾಷಿಯರ್‌ಗಳು ಸಹ ಸಹಿ ಪರಿಶೀಲನೆ ನಡೆಸದೆ ಹಣ ಡ್ರಾ ಮಾಡಿಕೊಟ್ಟಿದ್ದಾರೆ. ವಿಚಾರಣೆ ನಡೆಸಲಾಗುತ್ತಿದೆ’ ಎಂದು ಪೊಲೀಸರು ತಿಳಿಸಿದ್ದಾರೆ.
