ಕರುನಾಡು ಘರ್ಜನೆ ಸುದ್ದಿ ಬಾಗಲಕೋಟೆ: ಐವರು ಸಹೋದರಿಯರಿಗೆ ಮಕ್ಕಳಾಗಿದ್ದರೂ ತನಗೆ ಆಗಿಲ್ಲ ಎಂದು ಕೊರಗುತ್ತಿದ್ದ ಮಹಿಳೆಯೊಬ್ಬರು ನಗರದ ಜಿಲ್ಲಾಸ್ಪತ್ರೆಯಿಂದ ಹಸುಗೂಸನ್ನು ಕದ್ದು ಐದು ತಾಸುಗಳಲ್ಲೇ ಪೊಲೀಸರಿಗೆ ಸಿಕ್ಕು ಬಿದ್ದಿದ್ದಾಳೆ.
ಬೆಳಗಾವಿ ಜಿಲ್ಲೆ ರಾಮದುರ್ಗ ತಾಲೂಕಿನ ಖಾನಪೇಟೆಯ ಸಾಕ್ಷಿ ಯಾದವಾಡ ಆರೋಪಿ. ಈಕೆಗೆ ಎರಡು ವರ್ಷಗಳ ಹಿಂದೆ ಮದುವೆಯಾಗಿದ್ದು, ಮಕ್ಕಳಾಗಿರಲಿಲ್ಲ. ಇದಕ್ಕಾಗಿ ಬಾಗಲಕೋಟೆಯ ಜಿಲ್ಲಾಸ್ಪತ್ರೆಯಲ್ಲೇ ನಿರಂತರ ವೈದ್ಯಕೀಯ ಚಿಕಿತ್ಸೆ ಪಡೆಯುತ್ತಿದ್ದಳು. ಆದರೆ ಮಕ್ಕಳಾಗಲು ಸಾಧ್ಯವಿಲ್ಲ ಎಂಬುದು ಖಾತ್ರಿಯಾದ ಬಳಿಕ ಮಗುವನ್ನು ಕದಿಯುವ ಯೋಚನೆ ಮಾಡಿರುವುದು ಪೊಲೀಸರ ತನಿಖೆಯಿಂದ ಪತ್ತೆಯಾಗಿದೆ.
ಈಕೆ ಒಂದು ವರ್ಷದಿಂದ ಬಾಗಲ ಕೋಟೆಯ ಜಿಲ್ಲಾಸ್ಪತ್ರೆಗೆ ನಿರಂತರವಾಗಿ ಗರ್ಭಿಣಿಯರು ತಪಾಸಣೆಗೆ ಬರುವ ರೀತಿ ಬಂದು ಹೋಗಿದ್ದಾಳೆ. ಈ ಅವಧಿಯಲ್ಲಿ ಅಲ್ಲಿನ ಹೆರಿಗೆ ಐಸಿಯು ವಿಭಾಗ, ಸಾಮಾನ್ಯ ವಾರ್ಡ್ ಎಲ್ಲವನ್ನೂ ಗಮನಿಸಿ ಮಗುವನ್ನು ಕದಿಯಲು ಯೋಚಿಸಿದ್ದಳು.
