ಕರುನಾಡು ಘರ್ಜನೆ ನವದೆಹಲಿ (ಏ.1): ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಸಂಚರಿಸುವ ಖಾಸಗಿ ವಾಹನಗಳಿಗಾಗಿ ನೀಡಲಾಗುವ ಫಾಸ್ಟ್ಯಾಗ್ ವಾರ್ಷಿಕ ಪಾಸ್ ಬೆಲೆಯನ್ನು NHAI ಹೆಚ್ಚಿಸಿದೆ. ಡಿಸೆಂಬರ್‌ನಲ್ಲಿ ಜಾರಿಗೆ ಬಂದಿದ್ದ ಈ ವ್ಯವಸ್ಥೆಯು ಈಗ ಹೊಸ ದರಗಳನ್ನು ಹೊಂದಿರಲಿದೆ. ಏಪ್ರಿಲ್ 1 ರಿಂದ ಫಾಸ್ಟ್ಯಾಗ್ ವಾರ್ಷಿಕ ಪಾಸ್ ಬೆಲೆಯು ₹3,075 ಆಗಿರಲಿದೆ. ಪ್ರಸ್ತುತ ಇದರ ಬೆಲೆ ₹3,000 ಆಗಿದ್ದು, ಈಗ ₹75 ರಷ್ಟು ಹೆಚ್ಚಳ ಮಾಡಲಾಗಿದೆ. ಈ ಏರಿಕೆ ಅಲ್ಪ ಎನಿಸಿದರೂ, ವಾರ್ಷಿಕ ಪಾಸ್ ಮೇಲೆ ಅವಲಂಬಿತವಾಗಿರುವ ಲಕ್ಷಾಂತರ ಬಳಕೆದಾರರ ಮೇಲೆ ಇದು ಪರಿಣಾಮ ಬೀರಲಿದೆ.
ಇದರ ನಡುವೆ ಈಗಾಗಲೇ ವಾರ್ಷಿಕ ಪಾಸ್ ಖರೀದಿ ಮಾಡಿರುವ ವ್ಯಕ್ತಿಗಳು ಹೆಚ್ಚಳದ ಮೊತ್ತವನ್ನು ನೀಡಬೇಕಾ, ಬೇಡವಾ ಅನ್ನೋ ಗೊಂದಲದಲ್ಲಿದ್ದಾರೆ. ಆದರೆ, ಈ ಹೆಚ್ಚಳ ಈಗಾಗಲೇ ವಾರ್ಷಿಕ ಪಾಸ್‌ಅನ್ನು 3 ಸಾವಿರ ರೂಪಾಯಿಗೆ ಖರೀದಿ ಮಾಡಿದವರಿಗೆ ಅನ್ವಯಿಸೋದಿಲ್ಲ. ಅವರ ವಾರ್ಷಿಕ ಪಾಸ್ ರಿನಿವಲ್‌ ಮಾಡಬೇಕಾದಾಗ ಅವರು 3075 ರೂಪಾಯಿ ಪಾವತಿ ಮಾಡಬೇಕಾಗುತ್ತದೆ. ಇದರಿಂದಾಗಿ ಈಗಾಗಲೇ ಖರೀದಿ ಮಾಡಿದವರಿಗೆ ಈ ಬೆಲೆ ಏರಿಕೆ ಬಿಸಿ ತಟ್ಟೋದಿಲ್ಲ
ಈ ಪಾಸ್ ಅನ್ನು ಕೇವಲ ವಾಣಿಜ್ಯೇತರ ಖಾಸಗಿ ವಾಹನಗಳಾದ ಕಾರು, ಜೀಪ್ ಮತ್ತು ವ್ಯಾನ್‌ಗಳಿಗಾಗಿ ವಿನ್ಯಾಸಗೊಳಿಸಲಾಗಿದೆ. ಈ ಪಾಸ್ ಪಡೆದವರು ಒಂದು ವರ್ಷದ ಅವಧಿಯಲ್ಲಿ ಅಥವಾ 200 ಟೋಲ್ ದಾಟುವವರೆಗೆ (ಯಾವುದು ಮೊದಲೋ ಅದು) ಉಚಿತವಾಗಿ ಸಂಚರಿಸಬಹುದು. ಆಗಸ್ಟ್ 2025 ರಲ್ಲಿ ಈ ವಾರ್ಷಿಕ ಪಾಸ್ ವ್ಯವಸ್ಥೆಯನ್ನು ಜಾರಿಗೆ ತರಲಾಗಿತ್ತು. ಪ್ರತಿದಿನ ಪ್ರಯಾಣಿಸುವವರು ಮತ್ತು ಆಗಾಗ ಹೆದ್ದಾರಿ ಬಳಸುವವರು ಇದನ್ನು ಹೆಚ್ಚಾಗಿ ಬಳಸುತ್ತಿದ್ದಾರೆ. ಇದು ಪ್ರತಿ ಟ್ರಿಪ್‌ನ ಟೋಲ್ ವೆಚ್ಚವನ್ನು ಕಡಿಮೆ ಮಾಡುತ್ತದೆ.
